By
27 верасня ў Варшаве адбыўся вялікі оўпэн-эйр #67ВольныДзень — фестываль салідарнасці з беларускімі палітвязнямі і іх сябрамі. Імпрэзу арганізавала Беларуская асацыяцыя палітвязняў «Да Волі!» пры падтрымцы партнёраў і сяброў Беларусі.
На сцэне фестывалю выступілі вядомыя беларускія музыкі: Сяргей Башлыкевіч (Leibonik), Юры Стыльскі (Дай Дарогу!), Алесь Дзянісаў, Уладзь Бернат (Dzieciuki), Уля Паўловіч (Atesta), Алесь Яшчанка і Сяржук Чарняк. Асаблівымі момантамі вечара сталі выступы былых палітвязняў Анатоля Хіневіча і Сяргея Далівелі, якія падзяліліся сваім досведам і словамі падтрымкі тым, хто застаецца за кратамі.
Спецыяльнымі гасцямі фестывалю сталі польскія артысты Szczupak і Kocur, што прадэманстравалі сваю салідарнасць з беларусамі праз музыку і мастацтва. Імпрэзу вялі музычная журналістка Марына Савіцкая і актор, вольны купалавец Ігар Сігоў.
Госці мерапрыемства маглі не толькі паслухаць жывую музыку, але і паспрабаваць стравы беларускай кухні — веганскія пачастункі, плоў, шашлык і легендарныя дранікі ад «Да Волі!». Святочная і цёплая атмасфера фестывалю аб’яднала беларусаў і палякаў у агульным імкненні да свабоды, салідарнасці і чалавечай годнасці.
Уваход на фестываль быў вольны, але ахвотныя маглі зрабіць данат ад 50 злотых на падтрымку палітвязняў. Усе сабраныя сродкі будуць перададзены на праекты аб’яднання «Да Волі!» — дапамогу сем’ям зняволеных і падтрымку былых палітвязняў.
Сярод партнёраў падзеі — Музей Вольнай Беларусі, Чэскі філіял Офіса Святланы Ціханоўскай, Прадстаўніцтва Аб’яднанага Пераходнага Кабінету па нацыянальным адраджэнні і асацыяцыя Razam.ch.
Фестываль #67ВольныДзень стаў чарговым сведчаннем таго, што беларуская супольнасць, дзе б яна ні была, застаецца адзінай у жаданні свабоды і справядлівасці.
