Выстава «Беларусь. Галасы забароненых кніг»

Чаму ў Беларусі забараняюць кнігі? Хто прызнае іх «шкоднымі» і як працуе механізм цэнзуры? На гэтыя пытанні не заўсёды існуюць дакладныя адказы. Асаблівасцю беларускай рэчаіснасці з’яўляецца адсутнасць зразумелых і публічных тлумачэнняў з боку рэпрэсіўных структур. Кнігі знікаюць з бібліятэк, кнігарняў і школьных праграм — разам з імі знікаюць важныя ідэі пра мову, гісторыю і свабоду.

Музей Вольнай Беларусі сумесна з Беларускім ПЭН-цэнтрам запрашае на выставу, прысвечаную кнігам, забароненым у Беларусі. Экспазіцыя вяртае голас творам і аўтарам, чыя творчасць была абвешчаная «экстрэмісцкай», «шкоднай для нацыянальных інтарэсаў» або «непажаданай інфармацыяй». Гэта расповед пра слова, якое працягвае жыць, пакуль ёсць тыя, хто гатовы яго чытаць.

Цэнзура ў Беларусі сёння:

• больш за 311 кніг забароненыя з палітычных і ідэалагічных прычын
• больш за 256 аўтараў і аўтарак знаходзяцца пад забаронай
• 5 выдавецтваў ліквідаваныя за апошнія пяць гадоў
• не менш за 31 чалавек, звязаны са словам, знаходзіцца ў зняволенні

На выставе прадстаўленыя выбраныя гісторыі кніг і іх аўтараў, якім дзяржава вынесла прысуд цэнзуры. Наведнікі змогуць пачуць «галасы» забароненых выданняў, пагартаць іх старонкі і лепш зразумець механізмы рэпрэсій у дачыненні да літаратуры.

Як адзначае старшыня Беларускага ПЭН-цэнтра Таццяна Нядбай, сабраныя на выставе кнігі вельмі розныя — паводле жанраў, тэм і чалавечага досведу, але аб’ядноўвае іх адно: непрыманне ідэй таталітарнай дзяржавы. Літаратура, якая не прыслужвае ўладзе, а слухае жыццё і бярэ адказнасць за праўду, заўсёды ўспрымаецца дыктатурай як пагроза. Аднак гісторыя сведчыць: не існуе цэнзара, які здолеў бы перамагчы слова.

Інфармацыя для наведнікаў

📍 Музей Вольнай Беларусі, Варшава, вул. Foksal 11
📅 24 студзеня — 7 лютага

🕒 Час працы выставы:

• аўторак — пятніца: 16:00–20:00
• субота — нядзеля: 12:00–20:00

Музей Вольнай Беларусі запрашае наведаць выставу і разам пачуць галасы кніг, якім у сваёй краіне наканавана маўчаць.

‍