Польскі Мемарыял запусціў праект «Wolni» — серыю інтэрв’ю з вызваленымі палітвязнямі

Польскі Мемарыял запусціў новы праект «Wolni» — серыю з 15 глыбокіх інтэрв’ю з былымі беларускімі палітычнымі зняволенымі, вызваленымі ў 2025–2026 гадах.

У межах праекта героі распавядаюць пра свой досвед палітычных рэпрэсій, зняволення і вызвалення. Інтэрв’ю публікуюцца ў арыгінале — на беларускай або рускай мовах — а таксама ў польскім перакладзе. Гэта дае магчымасць расказваць гісторыі беларускіх палітвязняў не толькі беларускай аўдыторыі, але і польскаму грамадству.

Для Музея Вольнай Беларусі такія ініцыятывы асабліва важныя. Захаванне асабістых сведчанняў людзей, якія прайшлі праз палітычныя рэпрэсіі, і распаўсюджванне гэтых гісторый дапамагаюць супрацьстаяць забыванню і захоўваць памяць пра падзеі сучаснай Беларусі. Падтрымка беларускіх палітвязняў і магчымасць даносіць іх гісторыі да шырокай аўдыторыі таксама з’яўляюцца важнай часткай міжнароднай салідарнасці з беларусамі.

Мы радыя магчымасці дзяліцца матэрыяламі праекта «Wolni» і спадзяёмся на далейшае супрацоўніцтва з Польскім Мемарыялам.

Інтэрв’ю з Аленай Гнаук

Адным з першых герояў праекта стала Алена Гнаук — беларуская актывістка і былая палітычная зняволеная.

Інтэрв’ю даступнае на беларускай мове і ў польскім перакладзе:

• Алена Гнаук — беларуская версія: глядзець інтэрв’ю на YouTube
• Алена Гнаук — польская версія: zobacz wywiad po polsku na YouTube

Праект «Wolni» працягвае збіраць і захоўваць асабістыя гісторыі людзей, якія сталі ахвярамі палітычных рэпрэсій у Беларусі.

‍