Сёння Беларусь страціла аднаго з выбітных сваіх сыноў. 11 жніўня на 80-м годзе жыцця памёр Аляксандр Мілінкевіч — беларускі палітык, навуковец, грамадскі дзеяч, кандыдат у прэзідэнты Беларусі ў 2006 годзе, лаўрэат прэміі імя Андрэя Сахарава «За свабоду думкі».
Гэта вялікая і балючая страта для ўсіх нас — і для ўсёй свабоднай Беларусі.
Аляксандр Мілінкевіч быў чалавекам, які на працягу дзесяцігоддзяў паслядоўна працаваў дзеля дэмакратычнай, незалежнай і еўрапейскай Беларусі. Ён верыў у сілу грамадства, у годнасць чалавека і ў тое, што Беларусь абавязкова стане свабоднай. У 2006 годзе ён стаў адзіным кандыдатам ад аб’яднаных дэмакратычных сіл на прэзідэнцкіх выбарах і атрымаў прэмію Сахарава Еўрапейскага парламента за сваю дзейнасць у абарону свабоды і дэмакратыі.
Але яго спадчына — не толькі палітычныя пасады і ўзнагароды. Гэта людзі, якім ён дапамагаў, ініцыятывы, якія падтрымліваў, веды і ідэі, якімі дзяліўся.
Для Музея Вольнай Беларусі памяць пра Аляксандра Мілінкевіча асабліва важная. Ён быў адным з тых людзей, чыя дзейнасць стала часткай гісторыі беларускай барацьбы за свабоду.
Мы выказваем шчырыя спачуванні сям’і, родным, сябрам і ўсім, хто ведаў і любіў Аляксандра Мілінкевіча.
Ён назаўжды застанецца ў гісторыі Беларусі — і ў нашых сэрцах.
Светлая памяць.
*На фота: Аляксандр Мілінкевіч у Музеі Вольнай Беларусі на выставе "Revision 30", сакавік 2024 года.
