Музей Вольнай Беларусі запусціў новы сайт

Музей Вольнай Беларусі прадстаўляе новы сайт — сучасную лічбавую прастору, якая робіць музей яшчэ больш адкрытым і даступным для наведвальнікаў з усяго свету.

👉 https://freebelarus.museum/

Каманда музея на працягу доўгага часу працавала над стварэннем платформы, якая аб’ядноўвае інфармацыйныя, даследчыя і адукацыйныя магчымасці і дазваляе зручна знаёміцца з дзейнасцю музея анлайн.

Што новага на сайце?

Новы сайт дае магчымасць:

• сачыць за актуальнымі анонсамі падзей, выстаў і музейных праектаў;
• даследаваць алічбаваную калекцыю, якая ўжо налічвае больш за 200 артэфактаў — ад рэчаў палітвязняў да аб’ектаў, звязаных з пратэстамі;
• пазнаёміцца са знакавымі экспанатамі, сярод якіх артэфакты Палка Каліноўскага, вядомая сукенка БЧБ-нявесты і «Ева», што ўжо сталі візуальнымі сімваламі сучаснай беларускай гісторыі;
• прайсці віртуальную экскурсію па фондавай калекцыі і даведацца больш пра гісторыі экспанатаў, перамяшчаючыся па музейнай прасторы анлайн;
• скарыстацца каталогам бібліятэкі і запісацца ў чытальную залу;
• хутка звязацца з камандай музея для супрацоўніцтва або партнёрскіх ініцыятыў.

На сайце таксама можна запоўніць анкету даследавання аўдыторыі Музея Вольнай Беларусі. Вашыя адказы дапамогуць нам лепш зразумець інтарэсы і патрэбы наведвальнікаў, удасканаліць камунікацыю і зрабіць музейную прастору яшчэ больш адкрытай і карыснай.

Стварэнне сайта — важны крок у развіцці Музея Вольнай Беларусі як сучаснай інстытуцыі памяці, якая імкнецца захоўваць і прадстаўляць сведчанні найноўшай беларускай гісторыі, а таксама пашыраць доступ да іх праз лічбавыя інструменты.

Запрашаем наведаць новы сайт і адкрыць для сябе Музей Вольнай Беларусі ў анлайн-фармаце.

‍