Праект «Алічбоўка і публічнае прадстаўленне рэсурсаў Музея Вольнай Беларусі»

_{* Праект ажыццяўляецца ў межах праграмы «Лічбавая культура 2025» і сафінансаваны за кошт сродкаў Міністэрствам культуры і нацыянальнай спадчыны Польшчы, атрыманых з Фонду падтрымкі культуры — дзяржаўнага мэтавага фонду. Праект таксама суфінансуецца Фондам «Адукацыя для дэмакрытыі» у рамках праграмы RITA – Пераўтварэнні ў рэгіёне, якая фінансуецца Польска-Амерыканскім Фондам Свабоды.}

‍

Музей Вольнай Беларусі распачынае праект па лічбавізацыі і прадастаўленні доступу да назапашаных артэфактаў.

Праект прысвечаны сучаснаму і гістарычнаму лёсу беларускага народа — як прадстаўнікоў этнічнай меншасці, якія жывуць у Польшчы ўжо некалькі пакаленняў, так і значнай колькасці беларусаў, што прыехалі ў Польшчу пасля пратэстаў 2020 года.

Праект будзе цікавым таксама для даследчыкаў і асоб, якія цікавяцца гісторыяй Беларусі і барацьбой народаў Цэнтральнай Еўропы за незалежнасць і дэмакратыю. 

Вядучая мэта — Павелічэнне доступу да культурных рэсурсаў

Асноўнай мэтай праекта з’яўляецца захаванне артэфактаў сучаснага беларускага пратэсту супраць парушэння правоў чалавека і свабоды, якія захоўваюцца ў зборах Музея Вольнай Беларусі. Дзякуючы алічбоўцы і публікацыі лічбавых узораў, гэтыя матэрыялы будуць уключаныя ў сусветную культурную спадчыну. Праект таксама прадугледжвае забеспячэнне шырокага доступу да гэтых матэрыялаў праз анлайн-інструменты.

У Рэспубліцы Беларусь сёння назіраецца масавае падаўленне ўсіх формаў грамадзянскай кансалідацыі і сістэматычнае знішчэнне памяці пра супраціў беларускага народа дыктатуры Аляксандра Лукашэнкі. У краіне забаронены ўсе матэрыяльныя і культурныя напаміны пра значнае жаданне грамадства ісці альтэрнатыўным, дэмакратычным шляхам развіцця. Валоданне грамадзянамі Беларусі прадметамі, якія нават сімвалізуюць пратэст (напрыклад, элементы адзення ў бела-чырвона-белых колерах або фатаграфіі з масавых пратэстаў 2020 года), пагражае шматгадовым турэмным зняволеннем.

Місія Музея Вольнай Беларусі — захаваць гэтыя артэфакты для гісторыі і забяспечыць бясплатны доступ да іх. Дзякуючы алічбоўцы і публікацыі ў электронным фармаце музей зробіць магчымым для шырокай аўдыторыі, у тым ліку міжнароднай, пазнаёміцца з дакументамі і сведчаннямі беларускага супраціву.

У межах праекта запланаваны:

• адбор 200 артэфактаў і іх апісанне, якое змесціць  асноўныя метаданыя, гісторыю паходжання, культурны і палітычны кантэкст;
• лічбавізацыя і апрацоўка матэрыялаў: кожны аб’ект будзе адсканіраваны або сфатаграфаваны ў высокай якасці з выкарыстаннем прафесійнага абсталявання, з улікам захавання мастацкіх і матэрыяльных асаблівасцяў;
• стварэнне анлайн-базы (каталога) на трох мовах (польская, беларуская, ангельская) з фільтрамі, візуальнымі прэв’ю і функцыямі пошуку. Каталог будзе даступны шырокай публіцы.

Рэалізацыя гэтага праекта дасць магчымасць:

• захаваць і зрабіць публічна даступнымі ключавыя артэфакты новай гісторыі Беларусі;
• задзейнічаць інструменты лічбавай гуманітарыстыкі для папулярызацыі тэмы грамадзянскай супольнасці і антыаўтарытарнага руху;
• падтрымаць беларускую культуру і супраціў у міжнародным кантэксце.

У рамках праекта таксама прадугледжваецца стварэнне віртуальнай выставы музейных экспанатаў і правядзенне адукацыйных мерапрыемстваў для ўдзельнікаў Беларускай музейнай лабараторыі, скіраваных на абмен досведам, навучанне і распрацоўку рэкамендацый па лічбавізацыі культурнай спадчыны.

‍

СМІ пра праект:

‍
Музей Вольнай Беларусі распачынае праект па лічбавізацыі і прадастаўленні доступу да назапашаных артэфактаў

Музей Вольнай Беларусі распачынае лічбавізацыю калекцыі сучаснага беларускага супраціву

Музей Вольнай Беларусі распачынае праект па лічбавізацыі калекцыі, прысвечанай сучаснай гісторыі грамадзянскага супраціву ў Беларусі

‍